Magdy's blog
you are the one I want; the song from the film
iphone cost
لا لا انا مش باحب جديد للى بيتريق فى سره ايوه ايوه انا عندى 39 سنه و مش 19 وماعنديش مراهقه متاخره....
وانا مجدى مكرم مش اسامه منير
بس متهيائلى انه فى ناس عندها سوء فهم.....
الله مش محبه (لا لا استنوا شوفوا اقصد ايه) لكن الله حب
انتو عارفين ان الله حب ايون حب
حب, الله مش محبه (ايوه باقولها تانى ) - الله حب
ممكن نرجع للترجمات بتاعه فانديك و الملك جيمس الخ... حتى الترجمات الفرنساوى هاتلاقو انه مكتوب الله حب
God is love
Dieu est amour
بس علشان احنا مربوط فى زهننا غلط بين الحب و ...............خلاص خلاص مش هاقول بس اصبروا
وان الحب هو بينشىء عنه علاقة مابين 2 من جنسين مختلفن فترجمناه لكلمه المحبه اهى تبقى وقوره شويه . ولما حاولت اعرف كلمه محبه يعنى ايه بالانجليزى و دوريت فى الجواميس العربى (اه صح ايوه صح انتو قراتوها صح انا اقصده بالجيم) طلع معناها بالانجليزى:
Affection
لا يوجد مايسمى ب
"God is affection"
ولما دوريت فى القواميس النجليزى (و المره دى انا اقصدها بالقاف) على معنى الكلمه الانجليزى اللى فوق دى طلع تعريفها عاطفى، و تعلق ، ونزوع ، وحاله جسديه يعنى الله عاطفه... هاهاهاها قمه التهوين بالنون
خلونا نشيل كل افكار مسبقه عن هذه الكلمه..... من زمان و ماحديش يقدر يقول لحد باحبك فى مجتمعاتنا بالساهل وطبعا ماينفعش حد يقولها من جنس لاخر علشان هى مرتبطه فى ذهننا بحاجات .. يعنى كده حاجات فيها.... ايه مالكوا انا اقصد اعجاب و استلطاف .... الكلمه دى عليها حظر ادبى .....لا لا لا ماتخافوش انا مش بانادى انه احنا نقولها سداح مداح لبعض كده ده حتى عيب يعنى استغفر الله,( اصبروا للاخر و هارجع الحظر اللى على الكلمه دى اكتر مما كان عليها بس مش هايبقى حظر ادبى اصل مافيهاش حاجه قبيحه لكن هايبقى حظر بسبب قوه معنى الكلمه)
طول عمرى( ماكنتش عارف ليه) انا مش مقتنع ان "المحبه" تترفق و تتانى ...الخ كنت حاسيس بضعف معنى الكلمه كنت حاسيس اننا محتاجين كلمه قويه اكتر من كده علشان تخلينت نتحمل ... بس تعرفوا حاولت العب لعبه التاملات مع الكلمه دى عارفين اللعبه دى اللى هى تقول كل مايدور فى فكرك عند ذكر كلمه معينه فوجدت ان كل مايخطر فى باللى لما اسمع كلمه "محبه" هى: اظهار اللطف و الابتسامه و الوداعه و ان تكون ودود وبسيط
2 متجوزين من 40 سنه (مش احنا اصبروا احنا يادوب بقى لنا 13 سنه بس) وتلاقى الست قرفانه من خدمه جوزها لما جتله مصيبه من مصايب الزمن و تقوللك "باخدمه طول عمرى و عمرى ماشفت يوم حلو" ماهو علشان اللى بينهم مش حب....اللى بينهم محبه , عاطفة ساعه تروح و ساعة تيجى , حاله جسديه تعتمد على المؤثرات ...الخ
2 متجوزين..... غير الاولانيين (وبرضوا مش احنا) من 30 سنه وهو قرف منها بعد الاولاد لما اتجوزوا وبيقوللك انها مابيطمرش فيها..... ولا هو مش قادر علشانها يطيق عائله مراته اصلهم بلدى شويه مش من مستوى الباشا وامها عجوزه وبتعيد وتزيد فى الحكايات اللى قالتها قبل كده وهى مش طايقه امه اصلها مناخيرها كبيره شويه ........عادى المحبه لا تتحمل كل هذا ولا كل هذه السنين .... ولكن الحب يفعل المستحيل.... يعنى علشان بيحبها او علشان بتحبه ممكن يستحملوا كتييير.... كفايه على المحبه ان تظهر ثوانى معدوده للشحات اللى بيذن عليا فى الاشاره او لحد ما فى مصلحه حكوميه معطلنى ايام علشان مصمم ياخد رشوه ..( يوه معلش اقصد اكراميه) المحبه تاريخ صلاحيتها محدود ومداها محدود يعنى كبيرها الحاجات البسيطه لكن نعمل ايه... ماهو زى ما العربيات عندنا بتعيش 30 و 40 سنه وبره كبيرها 5 سنين, المحبه عندنا كده بس للاسف ماعندناش تجديد.بس الحب مابينتهيش .. ايوه عامل زى مستر اكس كده مالوش نهايه.
بس الحب بقى مخالف تماما طلع ان الحب مش اللى بيودى للجواز ده لو ودى للجواز يعنى و مش هو اللى بين طرفبن واحد ذكر و التانى انثى بس
طلع الحب هو الله : الله من الحب الغزير اللى جواه قرر يخلق الخليقه علشان تتمتع بالحب ده وكمان من حبه الغير نهائى و الغير مشروط بذل ابنه الوحيد حتى لا يهللك كل من يؤمن به بل تكون له حياه ابديه
الله طلع هو كتله حب
علشان كده الولد و البنت لما ينضجوا (خدوا بالكم فى لام و نون فى الولد و البنت) بيدوروا على حد يحبوا و يحبهم علشان يكملوا الدائره بتاعه ربنا.. ايوه دائرة الحب مش سنه الحياه.... ماهما بيبقوا شبه ولما بيتجوزوا ( يعنى لوعرفوا يتجوزوا) بيدوروا على حد تانى يمتعوا بحبهم فبيقرروا يجيبوا اطفال يتمتعوا بالحب ده... برضوا مش سنة الحياه و كانهم غصب عنهم...... يعنى بنقلد ربنا ماهو احنا اتخلقنا على شبه و بعدين بندور على اهلنا نصب عليهم حبنا
مافيش حاجه اسمها حب الاب و الابن و الزوجه و الام الخ...الحب نوع واحد له كذا شكل
الحب واحد فى النوع لكن مختلف فى الشكل، الحب فيه بذل و تضحيه زى ربنا بالظبط ، يعنى الحب عباره عن عبايه بنرميها على من نحب فلوا رميناها على اولادنا يطلع حب ابوى او اموى (ومالوش دعوه بالدوله الامويه) و لو على طرف اخر يطلع حب يودى للجواز برضوا لو ودى للجواز الخ....
الترجمات العربى اللى بتقول "المحبه قويه كالموت" نشيد 8:6 خطاء (طبعا هات..... علشان قلت خطاء و فى منكم ممكن يعملى بلوك فى الفيسبوك علشان مايدنسش خلاص بلاش هاقول غير دقيقه كده فرقت اوكيه) لكن الترجمات الانجليزى كلها بتقول
“For love is strong as death”
يعنى " الحب قوى كالموت" او
"واما ثمر الروح فهو محبة فرح سلام طول اناة لطف صلاح ايمان" غلاطيه 5:22 خطاء (خلاص اقصد غير دقيقه ) الصح هو
"But the fruit of the Spirit is love, joy, peace,”
صدقونى انا مش بهرطق بصوا بنفسكوا فى الترجمات وقوللولى
شوفتوا اللى كان بيترجم كان خايف اد ايه انه ينطق الكلمه الصح شوفتوا اد ايه قيود المجتمع ممكن تغير فى شكل الحقيقه ..
( طبعا انتو عارفين وقت اللى تمت فيه الترجمه للعربيه كان شكله ايه ..
كان ساعتها المجتمع اتشبع بالمفاهيم اللى جايه من الجيزيره العربيه اللى كانت بتعتبر التعبير عن الحب انه زنا)... ( طبعا حد هايقولى ياعم مجدى "كنت لليونانى يونانى ..." وكده يعنى كلمهم باللغه اللى يفهموها ......اكيد أوكيه بس مش لدرجه انى اهون الحق و اخففه زى مابنعمل فى زجاجه البريل اللى بنستخدمها فى المطبخ) قيود المجتمع ممكن تغير حتى فى الوحى (المجتمع و قيوده لهما نفوذ اقوى من الحقيقه يعنى المجتمع لو شايف حاجه غلط حتى لو هى صح تبقى اكيد غلط-احنا بنشوف الحاجات بعيون المجتمع مش بعيونا احنا طيب حلو... نودى عيونا فين لما احنا مش هانستخدمها... يعنى عيونا او ذواتنا او عقولنا ...اخ هاندخل فى منطقه وعره بلاش احسن )، مش عارف الترجمات الغلط (تانى الغير دقيقه) دى هى اللى خلتنا دلوقتى نستهين باساسيات الحياه ذى الحب و الا احنا اللى كان من الاصل ماعندناش استعداد نهتم بالحياه نفسها.....
دلوقتى هانفذ الوعد اللى قلته و نرجع الحظر تانى (بس المره دى مش هايبقى حظر ادبى ولا علمى حتى لا اقصد انه المرة دى هايبقى بسبب فهمنا الصح لاصل الكلمه دى ). حد من اللى قراء الصفحه دى من الاولاد او البنات هايقدر يقول لحد "باحبك" بالساهل غير لما بيكون بيعنى انه مستعد يتبهدل علشان الطرف الاخر ذى ما المسيح اتعذب علشان اللى بيحبهم متهيائلى صعب ..هاهاهاها ده لما فى متزوجين اصلا هايبقى صعب انهم يقولوا لشريك حياتهم "باحبك" بعد كده.... حتى فى جسد المسيح صعب حد يقصد انه يحب حد بعد ماعرف انه الحب مش كلام وصلاه بلسان او من غير و انات فقط (يعنى اصل الجسد دلوقتى بقى "هاى شله" و بس ... لا طبعا مش كله بس 99،99% او بقى شويه ناس بتعرف بعض من بعيد وبس.... طبعا لا مش علشان الجرب.. علشان الخدمه اهم من اللى بيخدم معايا----- يعنى لو هو هيتكعبل مش مهم نبقى نصلى له صح ولا....—طبعا انا مش عايز ادخلكوا فى متاهات زى الرؤيا و التبرعات و العلاقات واى حاجه كبيره او صغيره غير الناس اللى عاده محتاج ناس تتدفى فيهم من نار المعارك اليوميه الصعبه... لكن طبعا احنا مش بنحب نسمع اى حاجه غير التقدم فى الخدمه ...هو احنا ايه اللى دخلنا فى الحته دى يلا بينا نرجع تانى) لكن استعداد انه مش يمشى ميل واحد لكن كل الاميال من اجل اللى بيحبه كل الاميال حتى لو وديته لعذاب زى الصليب... ترنيمه زى "نعلن عن حبنا لبعضنا" ماحديش غير الاطفال يقدر يقولها دلوقتى اصلهم هما بس اللى يقدروا يقولوها و يعملوا بمعنى كلمه الحب .. انتوا مش ملاحظين ان عند الكبارالترانيم اللى فيها معنى زى اننا نحب بعضنا البعض قليله... جايز معدومه ايوه معدومه زى معدومى الدخل كده.. طيب اقولكوا حاجه حاولوا تكتبوا فى ورقه اسماء بالناس اللى فى حياتك اللى انت ممكن تكون بنحبهم (بس مش عندك ليهم محبه لا بتحبهم و مش الحب اللى فيه تسبيل لا لا لا حب زى ماتفقنا يعنى ممكن تموت علشانهم) طبعا الورقه دى هاتكون فاضيه من كل الشخصيات العامه هاهاهاها يعنى انتو فاهمين اقصد ايه ..... ايه مش لاقين حد تحطوه فى الورقه دى لا فكروا شويه ايه مش مذاكرين.. طبعا الايد الواحده كفايه فى عد الاشخاص اللى كتبتوهم... على العموم انا هاصعب الامتحان.. - لا لا ماتخفوش كلنا هاننجح احنا ماعندناش سقوط ماهى من (محبته) ايه ده ايه ده انا قلت محبته لا لا خالص انا اقصد حبه (عايزين نبطل كلمه "محبه" دى خالص غير لو انت تقصد محبه مش حب) كنا بنقول ايه اه من حبه مش هايخلى حد يقع - المهم دلوقتى هانشطب من الورقه الاسماء اللى بالغريزه ممكن نضحى بحياتنا علشانهم زى اولادنا مثلا وممكن لو فى الورقه اهلنا ..نشيلهم كمان ماهو اصل القطه كمان بتضحى علشان خاطر اولادها و احنا (و انا منكم) اكيد يعنى ارقى من القطه (طبعا انتو عارفين ان القطه من فصيله ايه....... لا لا ماتقولوش كده انا ماكنتش اقصد كده انا اقصد انها ثدييات يعنى) لو اتبقى فى الورقه عدد 2 شخص يبقى الف مبروك انتوا فوق حد النجاح...لا بس ماتفرحوش كده ... (طبعا 2 فى الورقه يعنى شريك حياتك منهم و حد تانى .. اما اللى مش مرتبط فوجود 2 عنده فى الورقه ده معناه انه ناجح بدرجه جيد ماهو اصل شريك الحياه المفروض يبقى فى حب ليه مش محبه) دلوقتى هاديكوا واجب للاجازه الكبيره..... و هايبقى هو امتحان اخر السنه اللى جايه... ياترى مين فى الورقه دى من اعدائك؟؟؟؟؟؟؟؟
مش هو المسيح قال احبوا اعدائكم..
كل مره نلاقى آيه فيها كلمه "محبه" نحولها لكلمه "حب" و فى كل مره نقراء آيه فيها كلمه "حب" نحولها لل"زى مانا مت علشانك"
يسوع قال "...... كما احببتكم" يو:12:15
مش كده ولا اييييهههه
حب ولا محبه ولا مش فارقه؟
. ورثنا من المجتمع فكره انه اى راى غير التمجيد والمديح يبقى بيغلطنا وبتبقى ادانه و ده عيب فبنهجم على اى حد يحاول يقولنا رايه لو مخالف لينا ، عندنا حساسيه تجاه النقد و بنعض( ايون زى ....معلهش القافيه تحكم وبعدين مش هو ده اللى بيحصل خلاص يبقى نقوله) اى حد يحاول يقول راى فينا غير المديح بالرغم من انهم بيحبونا
• مماراسات المجتمع المستمره عبر الزمن بترسخ فى اذهنا افكار زى الاصنام يعنى مثلا من 7000 سنه يعنى ممكن نقول من 7050 سنه عمالين نتشدق بتاريخنا و حضارتنا الفراعونيه -وده طبيعى يعنى الفراعنه فعلا عملوا حاجات مالهاش مثيل من ساعتها واحنا عمالين نكبر فى نفسنا وننفخ، بسبب ان المعابد الفرعونيه لم تسجل الا الانتصار ولم تتكلم عن الهزيمه و لم تشكر رجالها على مجهودهم رغم الاخفاق فاحنا ماتعودناش نسمع عن الاخطاء و ماتعودناش نحترم اللى بيعملوا الاخطاء ونرفض اخطائهم بس من غير ماننرفضهم هما ماهو اصل تاريخنا بتاع ال7050 سنه مافهوش امثله لكده وبكده يبقى عندنا فوبيا الخطاء ونقاوم الانتقاد احسن يبينا اننا غلط طبعا صعب علينا بعد كده نعترف بحاجه غلط ولا يطلع عندنا حاجه غلط لازم يكون كله ..-ايـــه طبعا -تمام ، الحروب اللى داخلناه كلها انتصارات ماليين بيها كتب التاريخ لكن شويه الهزائم بنقف عندها زى وقفه الاتوبيس فى المحطه شويه صفاحات بسيطه تتكلم على الهزائم اللى دايما بيبقى ليها سبب غير خيبتنا.... يعنى هزيمه 48كانت بسبب اسلحه فاسده ده جايز حقيقى لكن فى الاصل مين اللى دخل الاسلحه دى؟ ماهى خيبتنا يبقى نخلص و نقول احنا كنا غلط... و 67انهزمنا علشان مش عارف مين قائد الجيش كان خيبه ماعرفيش يعمل ايه؟! هو قائد الجيش ده كان مصرى بالانتساب ولا مصرى اصيل ؟! القصد اننا مابنعرفش لما نبقى غلط اننا نقول احنا غلط بسبب الكبرياء بتاع ال7050 سنه حتى الزلزال بتاع 92 (ايون انا قديم كده) كان صعب علينا، حتى الناس فى الشارع وقتها قعدوا يقولوا اسرائيل هى اللى عملته؟! هو ماينفعش حاجه غلط تحصل من غير ماننسبها لحد غيرنا حتى القدر!................ طيب وازاى ده اثر علينا... اى واحد مننا لو حد حاول بس يقول رأيه فى اى حاجه و مش نقد ولا حاجه تلاقي الناس على طول يحطوا مبررات للى هما عملوا و يرموا اللوم على اى حاجه ان شالله الجو... قول لنقاش مثلا الحيطه دى لونها فارق عن اللى جنبها يقوللك اصل الالوان مغشوشه او ان الحيطه دى ضربه فيها الشمس عن اللى جنبها فنشيفيت اسرع ، مستحيل يقولك انه هو السبب ازاى حفيد الفراعين يطلع غلط يعنى .
• مره الخادم اللى كنت باخدم معاه سالنى ليه انا مش فعال فى خدمه معينه (و الحقيقه هى كانت خدمه فعاله و مباركه و كانت خدمته رائده فى مصر) هو ابتداها ولما اتكلمت معاه كان فى كلامى انه انا كنت شايف (ايوننننن هى دى المشكله ازاى حد يشوف) انه لو عمل كذا و كذا كان هايبقى افضل و انه انا ماعرفتيش اتعامل بالطريقه اللى هو رسمها فبالتالى وقفت... انفجر فيا و قالى مامعناه ان هو اللى ربنا مديله الخدمه دى وصح مش غلط ... الحقيقه هو ماشافش انه انا مش بانتقضه لكن كنت باقول راى فهجم على طول..... لالالا ماتعضيتش...
طب وازاى ده يبقى سجن... اقولوكوا لما نبقى حساسين كده للنقد مابنقدرش نعرف افكار جديده مفيده ممكن نعمل فيها تعديلات و تبقى افكار حلوه واحنا المستفدين بس لما مابنعمليش كده بنبقى محللك سر يعنى فى سجن النقص الشخصى الموروث من المجتمع مش قادرين نحضن الافكار الجديده و نتبناها ،خايفين نجرب حاجه جديده احسن نطلع غلط و سعتها بنفقد حاجات كانت ممكن تحصل و ممكن تكون حقيقى كويسه لينا.....كمان الافكار اللى احنا مسجونين فيها دى بتخلىينا نتصرف تصرفات ممكن تكون عدوانيه فمثلا المصرى او العربى معروف عنه عالميا انه مش بتاع نقاش علشان لو ماطلعش صح على طول بيقلب الطرابيزه وكرسى فى الكلوب.
مثلا عندنا معتقد موروث من الوعظات ان الاغنياء دول داخلين النار حدف علشان التفسيرات take away بتاعه مثل الغنى الغبى فمعظمنا بيتصرف فى الدنيا من منطلق ارضى بقليله و خايفيين نطمح حتى بينا و بين نفسنا اننا نعمل ثروه علشان مانروحش جهنم
• فتلاقى الولد (الخريج الجديد) فى مقابله قبول الوظيفه مش مهم عنده انه يفاصل فى المرتب اصل الفلوس دى وحشه مش مهم عنده انه الشغلانه اللى هايشتغلها دى بتساوى كام فى الحقيقه المهم عنده انه يلاقى حاجه.. طبعا فى ناس بتقبل و السلام علشان الاحتياج،... متربين على ان الطموح و الطمع واحد مش اتين مع انهم اتنين... فتكون النتيجه ان مافيش مسيحيين كتير بيفكروا حتى ينجحوا او يطمحوا فى اى حاجه هما بيشتغلوا بس علشان يجيبوا فلوس على قد العيشه.. - يعنى برضوا العيشه الكويسه مارينا و شرم و كده يعنى - هما موجودين فى مكان هما بيقولوا ان وقته بيسمح لهم بالخدمه و يغطى النفقات بس هما مش مدركين ان امكانياتهم الكامنه فى داخلهم تخليهم فى مناصب عليا او رجال اعمال باريزين او علماء مميزين او مناصب سياسيه و فى كل ده هايبقى لهم انجازات بارزه وبيعتبروا ده شهوات العالم المشكله مش فى كده ماممكن الناس ترمى تيجانها علشان خاطر المسيح بس المشكله انهم مش لاقيين نفسهم و بيتعذبوا و الكارثه الكبيره انهم مش واخديين دعوه من ربنا يكونوا للخدمه هما بسبب التربيه الغلط بيرقصوا على السلم ولا هما حققوا ذاتهم و بيستغلوا الوزنات اللى ربنا اعطاها لهم ولا مستريحين فى الخدمه....(مش كده ولا ايه ياللى بتقراء و بتبسم وبس)...مش عارف هما خايفين يعملوا مجهود فى الشغل فبيستروا وراء الخدمه فمايطلعوش كل مجهودهم فى الشغل بحجه الخدمه و مايطلعوش كل مجهودهم فى الخدمه بحجه الشغل ماهو ده اللى اسمه الرقص على السلم... لا الخدمه استفاديت ولا الشغل استنفع بيك برضوا ولا انت استفادت من الشغل كما يجب .
والسجن ده يبقى حرمك من انك تعرف قيمه ماتعمل ايه و ده ياثر على نظرتك لقيمه نفسك فى المجتمع و عادى يعنى هو انت اينيشتين يعنى ده فى زيك مليون
عندنا فكره (اكتسبناه من شويه اساطير و حكايات) ان الحكومه عارفه كل حاجه حتى فكر الانسان وفاضيه تراقبه حتى على سريره وعامله زى ناظر المدرسه اللى مانحبش نقرب منه ولا تيجى سيرتنا قدامه حتى لو بالحسن لان اللى فى مكفيه
• انا مشترك فى جروبات على الفيسبوك خاصه بالفيزياء ، ناسا للفضاء الامريكيه و حاجات علميه كده و باشارك باراءى فواحد من صحابى (لا مش جدى، يعنى هو من سنى كده) قال "خلى بالك الحاجات ده متراقبه" ليه يعنى هو انا باشارك بابتكارات دى تعليقات عاديه بتاعه حد فى علمى رياضه يعنى مالهاش دعوه بالسياسه ... صاحبى خايف يعمل حاجه تلفت الانظار حتى لو هى مش هاتضر، هو حد عايش فى سجن فكره (الفكره دى جات لوحدها اه صدقونى ماحديش حطها جوانا و حتى لو فى حد حطها جوانا يبقى حد كويس يعنى مش وحش ..)......مش هاعلق علشان التعليق ممكن يدخلنا فى سكك تودى للنوع الاول من السجون
طبعا انتوا عارفين الفكره (هى مش فكره هى حقيقه بس تستحق محاوله هدمها) ان الاقباط ماينفعوش يدخلوا فى السياسه علشان احنا اقليه و مش هانجمع اصوات او ممنوعين .....
• اه عارف ماهو ده ضد حقوق الانسان بس مش احنا (الانسان ده) لاننا مطلوب اننا نخضع بغض النظر عن اى حاجه، وطبعا تقسيرات take away . لمواضيع زى اخضعوا للسلاطين و للساده وناقص يقول لل.... وبعديين .. حرماتنا من الترشح لبعض المناصب كده يعنى المهم بيخلونا مستحرمين نحاول نعيش اقصد نحاول نتقدم كاقباط لاى مناصب ....هو انتو فاهمين انه بعد الحياه دى (طبعا فى الحياه الابديه بس دى مش هايبقى عندنا نفس الامكانيات اللى عندنا دلوقتى.. ) دى هايتبقى حاجه ممكن نكون ماعملناهاش فى الارض نعملها فوق.. او تحت (على حسب كل واحد رايح فين) فكركوا هاتعوضوا فى اى حياه اخرى زى البلاى ستاشين لالالا اول ماهتظهر كلمه جيم اوفر انتهيت كل الفرص مافيش تحسين زى الثانويه العامه، بقينا مكتفين بالفرجه كاننا مش عايشين فى بلدنا لكن فى فيلم فى سينما هايجى وقت و نهاجر اقصد و نخرج من السينما وتخلص بينا الحياه واحنا ماعملناش اى حاجه مناسبه لكل الطاقه الكامنه جوانا لاننا سلمنا بالموروث الاجتماعى لفئه موسومه بالحرمان...
فى راى سائد انه احنا بنكرس كل وقتنا للمسيح و بنقدسه وفى فكره متسلطه هى انه التكريس معناه انك تقضى وقتك كله خدمه ، صلاه ، و تسبيح لا مش بس ممكن تقضيه صلاه، خدمه،و تسبيح يعنى ممكن تعمل التشكيله اللى تحبها المهم ماتخرجش عن الاختيارات دى///و الوقت اللى بنقضيه فى اى حاجه تانيه يبقى وقت ضايع و خطيه كمان
بعد ماعرفت المسيح.... اه اصل انا مش مسيحى فى البطاقه بس.. اللى هايشولوا خانه الديانه منها بعد شويه و هاتبقى فى ناس لايصه ماهو اصل هما كانوا معتمدين على انهم مسيحيين فى البطاقه بس.... المهم بقيت باخدم وعلى حسب الفكره دى فماينفعش الاذن التى تسمع ترانيم تسمع اغانى العالم و ماينفعش اضيع وقتى اقعد اتفرج فيه على افلام...- لالا افلام عاديه محترمه واخده اوسكار انتو فاكرين ايه-طيب ماقعده مع ربنا افضل طب هو ليه اترهبن و انا مش فى الدير..المشكله انه انا مش كنت باسمع عدويه و هانى شاكر لا انا كنت باسمع ال( الأبا لا مش بابا لا هو ماكانش بيغنى باسمع ABBA – و مارى ماتييه و مايكل الله يرحمه اصله مات – و Village people وكريس دى برج...لالالا مش كريس ابنى) اما الافلام فكانت من نوعيه ( Love story و Coma... وكده على فكره انا قديم قوى) الحقيقه كانت حاجات كويسه بس يصراحه انا خفت زى ما عادل امام خاف فى المسرحيه ( انهم يشيلوا العده اللى ماكانتش اصلا عنده) فقمت مبطل ... فرجه وسمع اغانى ودخلت كهف اسمه الدروشه وانا هناك اكتشفت انه ماينفعش ماستخدمش السكينه فى الاكل و اكل بالايدين لمجرد ان واحد استخدم السكينه فى جريمه قتل مثلا كذالك ماينفعش ماسمعش اغانى ولا اتفرج على افلام لمجرد انه الناس بتستخدمها غلط بس اكتشفت ده بعد ما فاتنى حاجات حلوه كتير...لو ربنا عايزنا نعيش فى تقشف خلق لينا حاجات حلوه قوى ..قوى ليه زى العنب مثلا.... هاهاهاها مع مراعاه عدم الافراط فى الاستخدام.. لما يبقى فى ناس مستخصره وقتها فى تحضير ماجيستير او دكتوراه و تفضل تقضى الوقت ده فى الخدمه لانها مستحرمه تقضى الوقت فى العلم يبقى فى حاجه غلط (صدقونى كنت فى خدمه القائد بتاعها كان بيلوم خادمه معاه علشان كانت هاتحضر الماجيستير وكانت عنده مشكله اانى اخد كورسات متقدمه فى مجالى) ......دى حاجات مؤلمه بس فى حاحات زيها بتحصل بتبقى مش مؤلمه فى الاول لكن اثرها كبير زى:
المستقبل او حياتنا ممكن يضيع من ايدينا لما نتاثر بالافكار دى:
• يبقى تلميذ فى 3 اعدادى و المدرس يتاع الجبر (قبر يلمه) يقوله عمرك ماهتفلح لو دخلت رياضه ، المدرس بيقول كده علشان خلقه ضيق(مافيش دروس والعياذ بالله ده هو قصده مصلحه الولد ياولداه ..ده حته عندنا المدرسين مش بنى ادمينننن خالص..لا لا اقصد ملايكه.. طبعا ملايكه ساقطه... مشوها انه خلق سعادته ضيق) و الولد يستقبل ده بقرف لكنه صدقه و عاش الكلمه دى و فعلا يدخل ادبى اه يريح دماغه مع ان مخه رياضى... وممكن نكون احنا خسرنا فى المستقبل عبقرى فى الرياضيات كان ممكن يغير الدنيا.....يبقى دى حاجه تحزن ولا لا. الولد عمره كده ماهايعرف هو كان ممكن ينجح اد ايه فى الرياضيات.
• واحد كان نفسه يهاجر ويسيب الهنا اللى هنا لكن اهله و قاعدين يقولوا يابنى انت دكتووووووور اد الدنيا (طبعا الدنيا فى تعريفنا غير الدنيا اللى فى الحقيقه.. الدنيا عندنا هوا و مياه وبس و مش اى هوا و مياه لكن كمان ملوثيين) وهنالك هاتبقى بكتيره زبال ده لو بقيت ولا هاتطول سما و لا ارض و امثله كتيررررر عن الفشل اللى بره و الخيانه و البرد و ازاى بره ده ربنا غضبان عليه (طبعا احنا عايشيين فى دور ان مصر ام الدنيا اه مش مكتوب فى الانجيل مبارك شعبى مصر يبقى الباقى كله واطى...) وازاى كل اللى بيروحوا هناك بيشتغلوا اى حاجه.... لكن هو كان عايز يجرب بس خاف وفضل بجانبهم وبرضه خاب واهه الحمد لله بقى طايل الارض بس... ليه مجتمعنا لا يحتضن المغامره و التغير؟ ليه مسجونين جوه فكره ان اللى نعرفه احسن من اللى مانعرفوش...لا لا لا انا ماقصدش حاجه فى السياسه انا ماليش فيها اصلاو لا باعرف فيها... انتو عايزين تودينا فى داهيه
• واحد يبقى جواه حاجات ايجابيه كتير لكن لاننا مسجونين فى فكره "هو انت هاتصلح الكون ياخى - ولا- هو انت اللى بتفهم اللى فيهم يعنى – ماتعيش عيشه اهلك بقى" بنموت جوانا الفكره، لو وانت ماشى شفت حادثه لراجل و هو بيعانى عايز حد يسعفه ياترى هتتصل بالاسعاف طبعا لا هو احنا اصلا مالنا ولا مال اللى .... مهم جدا اننا مانسيبشى سلبيه المجتمع تسجن ايجابييتنا ، الحقيقه مين مننا لو كان مكان الراجل ده يحب انه تكون فى سلبيه كده ....
المجتمع يخليك نسر او اسد (كل واحد يختار اللى هو عايزه انا هاختار النسر و انتم تختاروا ايه؟) بس تبقى بداخل القفص او السجن بتاعهم وماتطلعش بره، الحقيقه انا عايز اطلع بره السجن ده مش مهم عندى ابقى ايه و انا براه....ممكن لما اخرج بدل ماطير المسافات العاليه اللى كان النسر اللى جوايا فاكر انه هايطيرها لما يخرج من القفص اقابل الرياح الشديده وماعرفش اطير غير امتار قليله و اكتشف ان النسر ده (انا يعنى) حته عصفور صغير ومش نسر ساعتها مش هازعل علشان انا اللى بضرب فى الرياح دى بجناحى الصغير مش هازعل ان انا مش باحلق عالى زى ماكنت باحلم و انا جو القفص لكن هابقى مبسوط ان انا طيرت بارتفاع امتار قليله اهى افضل من ان اكون نسر فى قفص لان ده اختيارى..... – عصفور حقيقى بيطير أفضل مليون مره من نسر تخيلى فى القفص - ..( طيب النسر بقى عصفور طيب واللى اختار الاسد هايبقى ايه؟؟.. لا ....بقى قطه)... الموضوع مش موضوع اسد وقطه ولاعصفور و نسر الموضوع انه المجتمعات بتزرع جوانا حاجات او افكار مش حقيقيه عننا و عن نفسنا و امكانياتنا فى اوقات يعطونا افكار عن انفسنا وعن امكانيتنا اقل من الحقيقه يعنى يخلو جوانا نقص او فى اوقات تانيه اكبر من حجمنا فيعظمونا بس يقييدنا علشان مانستخدامهاش والمجتمع بعض ساعات بيندهش لما بيشوف ان الافكار الخادعه ولا سيما اللى يتكبر فينا وفى امكانياتنا اللى حطها جوانا طلعت مش كدبه لكن حقيقه ....
تحذيرقبل الاستعمال: بس وانت بتخرج من القفص لازم تكون مستعد انك تواجه وتتغلب على الفشل قبل ماتستعد انك تحتفل، طبعا مش انت بقالك سنين جواه القفص ده انت حتى مابتعرفش تطير اصلا.
وانتوا هاتعملوا ايه؟ّ!.. تحبوا جوا ولا بره؟؟؟؟....
المهم انتوا عارفين انه السجن انواع ... .ايه لا طبعا مافيش بالفراوله ولا بالجوافه لا لا انا اقصد انه فى سجن المكان اللى هو ده بتاع انك تفضل محبوس فى مكان ... ايوه بتاع البورش ،ده اسهل الانواع اصلك بتبقى عارف هاتخرج امتى و مافيش حاجه تقدر تعملها تغير من المده اللى هاتقضيها ..... انت بتطلع اسوء من الاول بس مش بتموت....
فى نوع اخر اشد من ده بس الحيقيه كلنا مسجونين فيه...،اه انا و انتم... عادى ... اصبروا شويه....ده احنا مش مسجونين فيه علشان عملنا حاجه غلط بالعكس احنا مسجونين فيه علشان مابنعمليش حاجه ..غريبه مش كده ،لا ده اسمه سجن المشاعر والتعبير و مش التعبير بتاع ماده العربى..... ايوه المشاعر او التعبير حضرتك بتبقى حر طليق و بتعمل اللى انت عايزه بس ماتقدريش لا تقول مشاعرك ولا رايك لا مش علشان حاطيين قفل على بقوك ولا مؤخذا لا ده علشان و انت صغير ربوك على انه لو انت قلت رايك بصراحه (وادب) الناس هاتزعل و انه لازم تحط فى الاعتبار الناس تكون مرضيه فتقول الى الناس تحب تسمعه و ترضى بيه فتلاقى فى اى قعده كل الكلام ماشى فى اتجاه واحد يعنى مثلا يبقى واحد قاعد مع ناس (يعنى اجتماع شغل او خلافه ) فى الشغل و ممكن يبقى المدير او صاحب الشغل بيتكلموا فى موضوع والكبير يقول راى معين....فى ايه الكبير يعنى اقصد كبير فى السن يعنى او جايز بالصدفه يكون المدير او صاحب الشغل يعنى مش اقصد اكتر من كده ولا انتوا بقى اللى تقصدوا يكون بالصدفه يعنى..... لا ياعم قولوا انتم انا ماليش دعوه.... المهم ويكون الواحد ليه راى تانى فمايرضاش يحرج الكبير فيسكت او يبتدى يقول نفس راى الكبير.... هو يعنى لو قال راى مخالف ده يبقى في ايه غلط مافيهاش اهانه شخصيه لحد ولا للمدير و لا لو اتجرائت وقلت رايك تلاقى الشجيعه كلهم يجوا مع الكبير و يهاجموك و يثنوا على حكمه الكبير واتحس انت بقى انك من كوكب اخر ......اتربينا على ان الخبره ليها دور بس دى مش كل الحقيقه هى جزء منها بس وانتوا عارفين احنا كفايه علينا بس نصها هو احنا قد الحقيقه كلها مره واحده.....نص الحقيقه التانى هو انه لما الابدع يكون موجود وقادر على التعبير بيكون افضل من الخبره وياسلام لو الاتنين موجودين ..الابداع لما يكون فى السجن او يعنى يكون بعفيه شويه يبقى الاحتياج هو للخبره باى ثمن!!!!....
/ولا تركب تاكسى و يكون السواق بيتكلم عن موضوع معين و انت علشان تجاريه تقوم موافقه عليه و تكمل على الخط على طول اهو جايز يخفض فى الاجره شويه..... مصالح ....طيب جربتوا مره تاخدوا الراى المضاد للسواق هاتلاقوا بعد شويه هو اللى ابتدا يتنازل عن رايه اصل هو المره دى اللى خايف على مصلحته....ولا يعنى انت اللى هاتغير عن العالم....
/او مثلا بنت اتقدملها اكتر من واحد و مطلوب رايها تختار واحد بس ..طبعا ماتقدريش تقول فلان علشان باحبه... اه صح حب ايه لا لا تقصد بتستلطفه او ان شكله عاجبها ولا حاجه من الحاجات دى .. يعتبروها هنادى و يطخوها....لكن ممكن مثلا تقول ان ظروفه كويسه او الشقه اللى جايبها كويسه... اه كده مبلوعه مش تقولى ...... الافضل انها تطلع فى صوره مصلحجيه من انها تعبر عن مشاعرها اصل الحب عيب... اه انتو ماتعرافوش .. عيب.. .يعنى على ايامى هى دى كانت الحكايه بس دلوقتى انا باسمع انهم لا اقصد انهن بيعاكسوا الولاد و هما اللى بيصارحوا بالحب و ده تقدم ، الحقيقه انا مش عارف انا قضيت فى الكهف اد ايه ...لا صحيح. ...... ممكن اسئل سؤال تفتكروا البنت اللى مش قادره تعبر عن مشاعرها مع اهلها هاتعبر عن ايه مع جوزها؟ا...
/ ابنك ولا بنتك لما تحرمهم من حاجة كنوع من التاديب ، فتقوللك مثلا "انت وحش" و لا ابنك يقوللك "باكرهك علشان التاديب ده" نقوم نعتبر ده قله ادب و نزيد فيها كاباء و امهات.... طبعا احنا بنعتبر نفسنا ربنا للاولاد و البنات...... يعنى و انت حارمهم من الحاجات اللى بيحبوها عايزهم يقولوا ايه يموتوا فى دباديبكوا.. بيعبروا عن مشاعرهم وهما صح............ طبعا احنا متكممين زى .... السعرانين وعلشان كده لما بيفيض بينا الكيل بننفجر و بنعض ابونننن زي ال....../..... الى الاولاد بتعمله اسم حريه التعبير.. اللى هو دلوقتى من احد ركائز حقوق الانسان "freedom of speech" /عارفين طبعا ابوالهول ايوه اللى قاعد فى الجيزه و لم يحرك ساكنا بقينا زيه ، ابو الهول برضوا على فكره مؤدب ،شايف بلاوى من سنين ولم يتكلم...
/. ولا حد مسؤل خدمه فى يكون له رؤيه له ممكن تكون حلوه و على قلب ربنا لكن انت ليك راى تانى... لكن مش قادر تبدى رايك فى الموضوع اهوه خايف تتفهم غلط و الموضوع يكبر... فتسكت ما تشاركش....متهيائلى الموضوع ده بيحصل مش كده على فكره هو دايما بيحصل معايا علشان كده انا اتعوديت اسيب مخى او لسانى فى البيت وانا رايح معظم اجتماعات الخدمه ولما كانوا (يعنى هايكونوا مين: لسانى او مخى ) بيرفضوا و بيصمموا يجوا معايا كنت بافضل فى البيت.......لا ولو قلت رايك يقولولك "يابنى ابن ال....." لالالا -"الطاعة الطاعة الطاعة" - انتو فاكرين كنت هاقول ايـــه "ابن الطاعة تحل عليه البركه....." او " النعمة" الحقيقه انا مش عارف مين فيهم البركة و لا النعمة هى يعنى هاتحل عليه حاجه حلوه يعنى ....الحقيقه اصل البركات و النعم اللى اخدتها من ربنا ماجتليش من الطريق ده خااالص وكل ماكنت احاول اقول راي كانوا بيلجمونى بحاجات زى الرؤيا اللى القائد استقبلها كانت كده مش عارف هى ربنا اعطى له اي رؤيا.. رؤيا الخدمه ولا رؤيا اننا نتلجم وكان مناقشه الامور العليا حاجه كبيره علينا......ممكن يكون ليا راى مخالف عن اللى حتى ربنا اعطاه له و ده مش تشكيك فى ان ربنا هو اللى ادههاله لكن ده اسمه ممارسه حاجه من الحاجات البسيطه اللى ربنا اعطاها لينا كلنا واسمها حريه الاختيار و التفكير الحر /ارجوكم افهمونى انا مش باقول نبقى بجحين لكن كمان مش هاشطب شخصيتى تماما اتعويييييدنا دايما ان الحكمه بتطلع بس من الكبار فى السن او فى المقام (مع ان يسوع كان اصغر من بطرس و يوسف مثلا كان اصغر اخواته...ايوه فى واحد من ال12 اصغر منه...) بس ده مش حقيقى .........
/عارفين قصه المللك العريان و الطفل البسيط (لا لا ماتفهموش غلط... اصبروا)....]القصه دى مش بتاعتى ولكن سمعتها من واحد اثر جدا فى حياتى بالايجاب وله فضل عليا [...مش مشكله احكيهلكوا المهم ماتناموش: كان فى مللك عظيم عامل مسابقه لاجل تصميم زى ملكى عظيم يليق به ودعا كل المصممين و كلهم اتسابقوا فى عمل الزى العظيم وجاء واحد نصاب (الحقيقه النصابين عندهم زى عندنا ممكن يكون مستخبيى فى اى صوره حلوه علشان مايتعرفوش يعنى ممكن يكونوا لابسين "قـــ..." لا اقصد "ر..." لالا لا قائد او كابتن ايون كابتن ماحديش هيعلق على ده) قال للملك يافخامه المللك انت الزى اللى يليق بك يجب ان لا يكون له مثيل لا قبلك و لا بعدك وقال له ان جايب لك قماش لا يراه الا الحكماء و الابرار... امثاللك وقام شاور له بيديه الخاويه و كأن بها قماش وقعد يفرد القماش الوهمى (ايوننن شوفتوا البجاحه... لالالا انا مش واخد موقف شخصى) ايون هو ماكانش معاه غير الهوا وعرضه على سياده الملك..(وبعدين هاتودونا فى داهيه مشوها المللك دلوقتى مش حد تانى...) على انه ثياب و زى فخم ولكن لا يراه غير الابرار والحكماء....طبعا الملك كان مزيف كفايه انه مايقولش انه مش شايف حاجه (يعنى يطلع قدام الرعايا اللى فى القصر انه مش حكيم ولا من الابرار و هما يكونوا شايفيين القماش و هو لا) ساعتها هاتبقى فضيحته بجلاجل انه مش من الابرار ولا عنده كمان حكمه والحقيقه لانه هو مش من الابرار انصاع وراء الكدبه ولانه كمان معندوش حكمه عمل حاجه هو مش مقتنع بيها ايوه ماهو مش من الحكمه تعمل حاجه انت مش مقتنع بيها.. ايوه ماهو مش من الحكمه تعمل حاجه انت مش مقتنع بيها.. ايوه ماهو مش من الحكمه تعمل حاجه انت مش مقتنع بيها... ايه ده ايه ده معلش ماقصدش اعيده 3 مرات ده غالبا الكومبيوتر عجبته فعمل كده....كومبيترات اخر زمن....لااااا القصه لم تنتهى.. المهم النصاب فاز بجائزه الملك و الملك قرر انه يخرج فى موكب مهيب وهو لابس الزى (يادى الفضيحه) وفعلا خرج .. طبعا ماحديش من رعايه القصر قدر يقول حاجه اصل فى منهم لما شاف الحقيقه قال اكيد ياواد انا مش من الابرار وجايز احمق مش حكيم افضح نفسى لييييه..وفعلا الملك خرج فى موكب مهيب و عريان.... لا مش من كل حاجه يعنى كان لابس شويه ملابس من ايها تستره بس برضوا ماكانتش الزى الفخيم اللى الناس متوقعاه.... وطبعا كان يتقدمه فى الموكب احد رجال القصر وهو بيعلن ان الملك قادم فى زيه الجديد الفخيم اللذى لا يراه غير الحكماء و الابرار....طبعا مافيش من الشعب حد اتكلم ولا نطق.. اصل فى منهم اللى لما سمع الخبر لم يجروء على رفع عينيه وظل ساجدا اصله كان خايف يواجهه الحقيقه كان خايف يشوف القائد (مش عارف فى كلمات بتيجى كده من غير لازمه طبعا اقصد مسؤل الخدمه يوه لا لا اقصد الكبير اللى فى الشغل/المجتمع...ولا دى هو انا كنت مسميه ايه .. ايوه المدير..."القــ..."و لا ده اقصد "الر..." ولا ده ايون الملك)عريان كان خايف يكتشف انه (الملك) احمق و غير بار...وفى منهم لما سمع الخبر وبص انكسف يقول حاجه ويفضح نفسه انه احمق و نجس (ايون فى ناس بتفكر فى نفسها بالنقص على طول.. "لا ينبغى ان ارتقى فوق مايجب ان ارتقى"..) وفيه ناس بصيت و شافيت الحقيقه و ماقليتش حاجه اصله فكر فى نفسه وقال ماهى خربانه خربانه يعنى هو انا اللى اصلح الكون...فى ناس قالت يعنى لو الملك خرف المره دى هو دايما بيصيب فوتوله المره دى....وفى ناس قالت نخضع للسلاطين و كل سلطان مرتب ولا سيما انه اللى الملك بيعملوا مافيهاش حاجه ضد ربنا اقوموا ليه واكسر وصيه الكتاب...وفى ناس قالت طالما هما قالوا انه ده زى الحكماء و الابرار يبقى هى الحكايه كده و اكيد انا اللى فيا الغلط....فى ناس لما شافت الحقيقه قالت لنفسها هو احنا كده دايما عينينا على السلبيات بس مش بنشوف الايجابيات ....جاء طفل... ايون طفل (انتو عارفين الاطفال دول ... ايون الاطفال اللى لما بنحب نتكلم على حد هما يعرفوه ويكونوا شافونا بنمدحه فى وشه، مابنتكلميش قدامهم احسن قال ايه يفضحونا ويجوه قدامه و يقولوا الحقيقه اللى هما بس اللى بيعرفوا يقولها ببساطه... الاطفال دول اللى احنا لما بنحب نكدب ولا نعمل حاجه كده ولا كده مابنعملهاش قدامهم علشان قال ايه اطفال...طبعا علشان مايصدموناش و يقولولنا الحقيقه وش فى وش كده.... ايون الاطفال اللى هو واحنا ريحين بيهم عند حد بنقعد نلقنهم ازاى يقعدوا مؤدبين اصل اللى هما هايعملوه مقاصيف الرقبه دول هايبقى انعكاس للى احنا بنعمله فى البيت وكده هايفضحونا ببرائتهم طبعا سهل علينا نلجمهم و نكسر برائتهم من اننا احنا نتغير يعنى اصل صعب على نفسنا نربى نفسنا.... عرفتوهم) المهم الطفل بص و شاف الملك وقال بكل بساطه و برائه وعبر عن اللى هو شايفه وقال اللى هو حاسيس بيه "هاهاهاهاهاها الملك عرياااان" (اما عيل مش متربى صحيح.... حد يعمل كده و يقول اللى جواه)..... ساعتها الناس و الملك فاقوا من الغيبوبه وعرف الملك انه كان ...(لا لا لا مش انه عريان) احمق مش علشان ماكانش شايف الزى الملكى اللى مايشفوش غير الحكماء و الابرار لا علشان هو الوحيد اللى كان شايفه هاهاهاها الحقيقه المره ان الملك هو الى ماعبريش عن اللى هو شايفه و حاسيس بيه فغرق؟؟؟؟؟لما بنعبر عن اللى جوانا بادب واحترام وقبول للفكر المضاد ممكن ننور اللى حولينا او ممكن اللى حولنا يصححوا لينا وفى كل الاحوال احنا مستفيدين...ايون برافو عليكم هى دى بقى اللى اسمها الشفافيه.... فى بعض الاحيان سكوتنا بيخلى النصابين يفوزوا بغنيمتهم مننا و يعدوا فى وسطينا كابطال و احنا محبويسن فى قيودنا القيود الحقيقه مش من الحديد اللى اقوى منها قيود المشاعر و الافكار.... الحقيقه الحكايه دى حصليت معايا... لا يابنى انت و هو انا ماليش دعوه بالملك ... ولا بالــ.... وبعدين ...انا ماشى جنب الحيطه... اقصد فى الخدمه.. : كنا فى اجتماع خدمه و الخادم المسؤل ( وهو الحقيقه ممسوح...) كان بيشرح ايه المعوقات الشخصيه اللى ممكن الخادم المسؤل عن خدمه ما فى اى منطقه يقع فيها فتعاق الخدمه بسبب الخادم... وطبعا شرح باستفاضه عن المناطق اللى المسؤليين عنها تحت قيادته عملوا كده و نزل تويبخ....طبعا محسوبكم اللى هو انا افتكريت انه روح الاخوه و الخدمه تخلينى اتكلم بحريه و صراحه و اتفهم صح.. فقمت رفعت يداى علشان اسئل سؤال... (لا صدقونى انا ماكنتش كده ساخر زى مانا دلوقتى.. بس انا مش عارف هو اتلسع جامد ليه...) اه مانا هاقولكوا على السؤال و انتوا اشهدوا انا بقى سالته و قلتله طيب تفسر بايه ان المنطقه الفلانيه ( منطقته اللى هو مسؤل عنها مباشره) الخدمه فيها وقعت خالص......(طبعا كان فى اسباب كتيرغير ان اللى هوو انتم فكرتوا فيها) انا ماكنتش اقصد اللى جاء فى بالكوا لكن هو سال لو كان فى حد عنده سؤال و انا لما فكرت فى اجابه للسؤال ده فى دماغى اللى عاده بتودينى فى طرق وعره مالاقيتش اجابه فقلت اسئل.. بس ... ماهو انا ماكنتش اعرف انه لما حد يطلب سؤال انه يقصد اسئل سؤال فى المنهج وعلى الهوا و الطيف ماكنتش لسه اعرف انه فى ناس لما بتقول ابيض بتقصد اسود و لما بتقول اسود تقصد ابيض..لما بيقوله بنحب يقصدوا يكرهوا و لما بيقولوا بنكره بيقصودوا بنحب ... طبعا عايزين تعرفوا هو عمل ايه... الحقيقه هو رد بكل محبه (قدام الناس) وقالى بعدين هاتعرف....لا مش بس... بعد كده بفتره قصيرخرجنا من مجموعة الخدمه
.....
./ النوع ده من السجون بنقضى فى العمر كله ونبقى محظوظين لو عرفنا اننا فى السجن ده فى ناس بتقضى العمر و يخلص و مابتعرفش انها كانت فى السجن ده وده بيطلع علينا فى صوره امراض ...الخ. و ده مش هانخرج منه الا لو احنا حاولنا نعمل حاجه و ده شىء محمود (مش المليجى) من كل الجهات يعنى الحكومه مش هاتعترض عليه مش زى لو حاولت تهرب من السجن اللى من النوع الاولانى ... وممكن تستعين بصديق.... وكل ماتتاخر فى الفكاك من السجن ده هاتحتاج الصديق ده يعنى مثلا ....لالا هاتزعلوا مش هاقول.....
الى اللقاء فى النوع التالت من السجون.......
انواع السجون
مش عارف ابتدى منين الحكايه من الاول و لا من الاخر و لا من النص...... ده لو عرفيت ابتديها....
(احظر منطقه ساخره فحاسب لاتتلسع)
ابتدى من الكنيسه و لا من المجتمع و لا من العالم ... بس مش عارف ليه مش حاسيس ان مافيش فرق مابين الكنيسه و العالم و المجتمع.... هل ده لان احنا بيقنا كنيسه متعولمه و لا بقى العالم مكنيس....
مش عارف مين اللى عايش جواه مين: الكنيسه هى اللى فى العالم و لكنها ليست من العالم و لا: العالم اللى عايش جواه الكنيسه و هو مش منها.
عايشين فى عالم مانشيتات كله مانشيتات ولما تدخل جواه اى مانشيت ماتلاقيش ان اللى جواه له علاقه بالعنوان.....
تلاقى رجل اعمال من العالم ولكن عمال بيتبرع لاعمال الخير عمال على بطال... لا مش علشان اعفاء الضرايب ده بيسب قصوره و ينزل فى ادغال افريقيا بنفسه علشان و هو بتبرع يتكلم مع الغلبانين و يفك عنهم زلهم و غلبهم و هو مش بس مش مؤمن هو اصلا مش مسيحى.....( لا لا لا ده مش مصرى ده رجل اعمال اجنبى.....). و بعدين نلاقى المؤمنين عمالين يتبرعوا علشان اعمال الكرازه( اجهزه لازم تكون على اعلى مستوى... و تجهيزات المؤتمرات 5 نجوم و لو فى سفر تبقى تذاكر الطياره او القطار رجال اعمال علشان حضره خادم الرب.....وبيوت المؤتمرات بقى فيها دلوقتى حمامات سباحه و فنادق 5 نجوم....) المؤمنين بيتيرعوا بكل ده و يحسبوه من العشور مش قادر اعرف ازاى (انا مش بادين انا اسوء منهم بس عايز احط المسميات صح) و ناسيين خالص ان البشر مع الخلاص محتاجين رافه و حب لكن احنا مانقدريش غير اننا نديهم اللى من عند يسوع( الخلاص) مش من اللى عندنا احنا (نكلمهم و نعطيهم اهتمام لشخصهم )لا احنا بنعرفهم يسوع وبعدين هما يتصرفوا معاه فيما يتعلق بحالتهم..... و بعد كده نبقى نقول لهم عن فقرهم و غلبهم انها صليبهم و نسيبهم فى فقرهم و مرضهم و طينتهم ....انا مش باقول ان االناس كلها كده انا عارف ان فى استثناءات كويسه جامد فى ناس بتجيب اطفال مشردين فى بيوتهم و تعولهم حتى الزواج و ماتقدريش تفرق بينهم و بين ولادهم بس كان نفسى يبقى كله زى الجامدين دول و قله تبقى مش اد كده ,العالم بيسمى ده : اعمال خيريه / و احنا بنسمى ده اعمال كرازه / بس الكتاب بيسميه: " ان كان اخ واخت عريانين ومعتازين للقوت اليومي، فقال لهما احدكم امضيا بسلام استدفيا واشبعا ولكن لم تعطوهما حاجات الجسد فما المنفعة" يعقوب 15:2-16
فريق ترانيم محترم و كبير و ربنا مستخدمه بقوه ويحط على السى دهات يتعاته تحذير ضد النسخ و ذللك من اجل الحفاظ على الحقوق الماديه و حقوق الملكيه الفكريه...... لا لالا لا مش فريق (واما ولا بابا ولاماما ولا اوباما حتى) باقوكوا فريق ترانيم......؟؟؟؟؟؟؟؟؟؟؟ و لاانا فاهم برضوا ...... انا كنت فاكر ان مجانا اخذتم مجانا اعطوا... و بعدين موضوع الملكيه الفكريه دى لحد لخترع او ابتكر فكره و عايز يتربح من بنات افكاره.... صح ده صح لكن الترانيم هاتكون بتتكلم بفكر المسيح و الكتاب المقدس الموحى به من الروح القدس.... يعنى الافكار كلها مللك للروح القدس يبقى الروح القدس هو اللى احق بالحقوق دى و هو مش عايز مننا حاجه يبقى ناخد ثمن الحقوق دى باسمه ازاى....و بعدين لو انت عمليت مجهود فى العزف و الصوت ده هايبقى بسبب المواهب اللى حضرتك مادافعتيش فيها حاجه يبقى تاخد ليه كانك انت اللى كان عندك . احد الردود كانت علشان الخدمه تكمل يعنى الفلوس اللى جايه تتصرف تانى على الشرايط اللى جايه الحقيقه انا كنت فاكر ان الخدمه بتكمل بالروح القدس.... لالالا لسه النقطه دى لم تنتهى.... تسمع بقى السى دى يلاقى فيها ترانيم مترجمه من شرايط ترانيم انجليزى الاه طيب هو انتم دفعتم حقوق الملكيه الفكريه للفريق الاجنبى و لا... مجانا اخذتم مجانا اعطوه .....مش دى تبقى تجاره .. /////واحد مسيحى بس مش مؤمن قابلته فى كورس من كورسات الكومبيتر اللى اخدتها هو طبعا مبرمج و لكن دايس فى الموضوع و قاللى انا عمليت برنامج كمبيوتر مخزن فيه كل الترجمات للكتاب المقدس و حاطيت كمان التفسير التطبيقى للكتاب المقدس بالعهدين و كمان عامل محرك بحث للعربى كان رائع يعنى مثلا تقدر تعمل بحث بدون الهمزات و خلافة و كمان تقدر تعمل بحث بالتشكيل و تقدر تستخدم ال(*) يعنى لو مش عارف كتابه كلمه لانك ضعيف فى العربى زى حالاتى تقدر تمتب كام حرف من الكلمه و بعدين تحط علامه ال(*) و هو يدور ويجيب للك كل الشواهد اللى فيها الحروف بتاعه الكلمه اللى انت كتبتها مش هاطول عليكم لكن هو سالنى لو انا اعرف ازاى هو يقدر يوزعوا و هو مش عايز فلوس.... و لكن خدمه فقمت بالاتصال وعرفت ان الشركه الفلانيه ( ايوه شركه... لالا لالا مش شركه المؤمنين انا اقصد شركه من اللى ليهم سجل تجارى)و اخده حقوق توزيع و طباعه ترجمه فان ديك و دار الكتاب هى اللى واخده ترجمه الملك جيمس... اما التفسير التطبيقى فشركه تالته و اخدينه وبيوزعوه.... فقمت بنقل الكلام لصاحبى مع انى مش فاهم..: فسالنى ازاى حد ياخد حقوق توزيع و نشر حاجه لها علاقة بالكتاب المقدس هما ازاى عملوا كده هما ازاى اخذوها من ربنا مش هو ربنا اللى صاحب اليله دى ازاى وصلوا لربنا و اخدوها منه....... مره سالت فى معرض دار الكتاب اللى بيتعمل فى الكنيسه عن سعر الكتاب المقدس للنسخه اللى ليها فنط كبير فطلع ب120 جنيها......الحقيقه يابلاش... نسخه الويندوز يتاعه بيل جيتس ده يتاع الكمبيوتر ب 350 جنيها وايه اسمه مش بتدخل السما.....على فكره ... لا بلاش احسن اتفهم غلط.... بس بيل جيتس بيعمل عروض يعنى مره ممكن يفاجاك و يقول لو اشتريت 10 نسخ ويندوز تاخد 10 نسخ اوفيس...... ال احقيقه انا اشتريت من غير ماستنى ينزل عرض... لاطبعا اشتريت الكتاب المقدس مش الويندوز اصل انا عارف انه مش هاينزل العرض على الكتاب المقدس ثما ممكن السعر يزيد. .....عادى ممكن نعمل تجاره فى الخدمه ، مش بولس كان بيشتغل فى صناعه الخيم بس ماسماهاش حاجه تانيه عارفين كان ممكن يبيع الخيم بالدهب ..اه صدقونى اصل دى كانت هاتبقى من صناعه بولس و اكيد لما كان بيخيط الخيم كان بيرنم مثلا شوفوا انتم بقى ترنيم بولس مش اى حاجه دى اللى فكت قيودهم فى السجن و فتح الابواب كانت هاتبقى خيم متباركه قوى لا فعلا..عارفيين كان بولس لو عمل زى ماحنا بنعمل دلوقتى كان هايجيب فلوس للخدمه تخليه يروح يكتشف امريكا قبل كولومبس و يبشرهم بالمسيح,,,و لو كان بولس بيطلب حق ملكيه فكريه فى الرسايل بتاعته ماتوقلش كان ممكن دلوقتى مانلاقيش حد بيوعظ بيهم اصل كنا هاندفع فلوس كتير عن كل مره بنوعظ منهم عارفين هو ماعمليش كده ليه علشان الكتاب بيسميها:" لانه من يميّزك واي شيء لك لم تأخذه.وان كنت قد اخذت فلماذا تفتخر كانك لم تأخذ" 1كو7:4/ و العالم بيسميها اداره اعمال و احنا بنسميها:مستاسيرين كل فكر لاجل المسيح
"تعالو الى ياجميع المتعبين و ثقيلى الحمال و انا اريحكم".... بس الحقيقه احنا بنروح الكنيسه مستريحين ايوه بنريح نفسنا قبل مانروح له اصل الكنيسه لازم نبقى فيها على احسن صوره مش عارف ليه مع اننا بنروح المستشقيات و احنا تعبانين متهيائلى يعنى ماحديش بيروح للدكتور و هو كويس.. المجموعه بتاعه الكنيسه اللى باحضر فيها (جسد المسيح) متهيائلى فيها ناس مايعرفوش اسمى التانى ايه الحقيقة و لا انا... لا انا اعرف اسمى التانى ايه لا اقصد انا ماعرفش اسمهم هما التانى ايه....جايز بنروح مستريحيين علشان الكنيسه مابقتيش مكان فيه المسيح.. بعض ساعات باوصل المدام والاولاد الكنيسه و اطلع اركن العربيه فى الجراج و بابقى مش عايز انزل اروح الكنيسه اصلى عايز ابقى مع ربنا فى العربيه و مش عاوز اسيبه و لا اسيب الترانيم اللى باسمعها فى الكاسيت اصلى عارف الاقى ربنا فى اى مكان بس باحس بالذنب انى متهاون ازى اقعد فى العربيه وسايب عرض الازياء اللى فى الكنيسه... ايه ده ايه ده هو انا قلت عرض الزياء لالالالا اقصد الدرانيم (نعم بالدال) اللى فى الكنيسه و الوعظ.....؟!؟!؟! الحقيقه انا اتباركت كتير بالوعظ اللى فى الكنيسه اللى باحضر فيها و ربنا يباركهم بس فيى حاجه بتحصل بتصعب عليا الفهم: مثلا رؤيه الكنيسه ان الناس اللى كفرانه فى البلد لا تهاجر لكن تفضل مكانها سر حتى الموت وتصلى لغايه لما البلد تتغير, رؤيه نبيله و عظيمه بس افرض فى اشخاص مالهاش الرؤيه دى .. مش ممكن يضربوا راسهم فى الحيط يعنى .... طبعا وعلشان الكنيسه تؤيد الرؤيه فى كل مناسبه دوليه و محليه اللى بيوعظ يحط على قد مايقدر حكاوى عن مسؤى الهجره و ازاى الناس كلها بتروح و تفشل و ازاى اللى يخرج من داره يتقل مقداره وبيطعم الوعظه بالحكاوى الشخصيه دى (مره الواعظ قال مش عارف الناس دى عايزه تهاجر ليه؟/ عارف ليه علشان حتى فى الكنيسه الناس مش حاسه غير بالغربه) علشان الناس تخرج وتمشى بجانب الحيط اللى الكنيسه راسماه و انا ابقى قاعد عمال افلتر ايه الكلام الشخصى فى الوعظه و ايه اللى من عند رينا بالرغم ان الموضوع بتاع الهجره ده ماكانشى على بالى لكن مع التكرار حسيت ان الموضوع فيه ان. يعنى الوعاظ دلوقتى بيعملوا شفل رجال المبيعات.... ايه الحكايه هو مش ربنا موجود فى كل حته و لا اييييييه.. العالم بيسمى ده: كل واحد حر ، ومهارات التاثير الشخصى فى عمليات البيع / احنا بنسمى ده : المسحه / الكتاب بيسمى عكس الكلام ده: "وكلامي وكرازتي لم يكونا بكلام الحكمة الانسانية المقنع بل ببرهان الروح والقوة" 1كو4:2
كل ماتقابل حد بقى له مده ماقبلاكش يقوللك انت بتشتغل فين و شغلانتك ايه ثم يسالك و خدمتك ايه و بتخدم فين...... مش عارف افتكرت عادل امام فى المحكمه "رقاصه و بترقص.. نوريت المحكمه" يعنى مهندس كمبيوتر و معايا مكروباص مثلا.... مهندس و باشتغل مهندس و انا ابن ربنا و باعمل اللى بيقولى عليه يعنى ممكن مره يقولى سواق التاكسى اللى انت راكب معاها ده محتاج تشجيع و كلمه حلوه لان كل اللى بيركبوا معاه بيسبوله و كمان مراته و عياله علشان مش قادر يكفى بيته فى الدنيا الرخيصه دى فمحتاج حاجه كده تبل ريقه اهو جايز لما يحس بالحب من الناس يبطل البلاوى الزرقه اللى بيعملها... اهو احسن مانزل تقريع فىه على الخطيه اللى بيعملها و دخان السجاير المحشيه اللى بيشربه.. و مش عارف محشيه بايه. وممكن مره تانيه يقولى عدى الست اللى مش عارف تعدى دى من غير ماهى تساللك و تطلع كانت محرجة تسالنى.. و ممكن مره تانيه يقولى اقترح على حد فى الشات يتاع الفيس بوك من الخدام اللى فى بلاد الواق واق ازاى يترجم كتاب عن طريق الجوجل فى ثوانى من لغه الوق واق الى الانجليزى فالناس تستنير.... وممكن يستخدمنى فى وعظه...الخ عادى الناس مش فاهمه انه ممكن اكون فى مطار بلاد اجنبيه مثلا وباقول مثلا اللى قاعد جنبى(اه قاعد مش قاعده وبعدين ده مثلا) كان معاه الابتوب بتاعه و شوفته محتاس فى حاجه وا نا احب الحرك و الفرك فماقديرتش اقعد ساكت فساعدته من غير ماعرف لغته... يبقى اقوم اكتب فى السيره الذاتيه ان اشتغليت مهندس كمبيوتر فى مطاربلاد واق واق...كذلك الخدمه ممكن تعمل حاجات كتير بطلب من ربنا و مش لازم يبقى اللى بتعمله خط خدمه...يعنى الغرض انه ممكن تكون واعظ بس ماتنساش انك ابن ربنا تعدى واحد فى الشارع و ممكن تكون مسبح كبير لكن ده مش محددك فى هذا الاطار ممكن و انت مسبح تنظف حمامات لكبار السن و ده مايبقاش معناه انك سباك او خدام مثلا زى مانا مهندس كمبيوتر فى شركه و اساعد واحد فى المطار ده مايخلينيش مهندس فى المطار.. العالم بيسمى ده تعارف او سيره ذاتيه/ احنا بنسميه : الرسل اللذين اولهم انا/ الكتاب بيسميه:الخطاه اللذين اولهم انا
فى الكنايس بنصلى و نقول "مبارك شعبى مصر" و مش بتبارك بقالنا الاف السنين طب ايه الغلط.... بندخل محضر ربنا كاننا لم نقراء عن مثل العشار و الفريسى و نقول بكل جساره "مبارك شعبى مصر" و مش بناخد حاجه... و ناسيين انه فى الكتاب اننا لازم نأوى الارمله و المسكين و اليتيم و الفقير و الغريب.... و احنا مش بنعمل كده و كمان ناسيين انه الوعد عدى على شعب الله ولم يقف عندهم (انهم فقدوا الوعد ).. وعداهم للامم لانهم لم يسمعو للرب و بنقراء ده فى العبرانيين و بنوعظ بيه بس مش شايفينه على نفسنا
العالم اخد مبادئى الكنيسه و سماها حقوق انسان و احنا اخدنا مبادئى العالم و سميناها بكل حاجه حلوه فى الكتاب المقدس
بنقول الصح و مابنعملوش و بنعمل الغلط و نقول عليه صح
ألنا منظرأحياء و نحن أموات ؟؟؟؟؟؟
